لما مسلم سألني باستغراب؛ هو ليه المصريين مش بيتكلموا بالفصحي؟ شعرت بإحراج فظيع من الشاب القبرصي المولد، انجليزي الجنسية، اللي بيدرس اللغة العربية، وافتكرت موقف من كام سنة لما كنت في امتحان سنة من السنين في الكلية، وجه الدكتور المشرف علي لجنة الامتحان علشان يمضي علي ورقة الاجابة بتاعتي، واذبهليت لما لقيته بيمضي بالانجليزي.. سبت الورقة والامتحان وسألت نفسي: هي اللغة العربية عقمت عن انها توفر توقيع للدكتور المحترم صاحب أعلي الدرجات العلمية؟ المهم .. بدأت استرسل في كلام فارغ، مع انه حقيقي، علشان أبرر لمسلم، القبرصي المولد، انجليزي الجنسية، اللي بيدرس اللغة العربية، وانا بجاوب علي سؤاله، ليه المصريين مش بيتكلموا بالفصحي؟
رجعت بذاكرة العالم للحقبة الاستعمارية، وقلت لمسلم ان ده السبب الرئيسي في استبدالنا لغتنا بلغة المستعمر، وان في نظرية تاريخية بتقول ان في مرحلة من المراحل المستعمر-بفتح الميم- بيقع في غرام المستعمر-بكسر الميم- لكن الغريب ان ده ما حصلش زمان أيام الدولة العثمانية ولا أيام الاحتلال الانجليزي، لكن حصل بعد كده، بعد ما الاستعمار غير من جلده، وتخلي عن السيطرة العسكرية علي مستعمراته واللي بيقولوا عليها بالانجليزي هارد بور، واستبدل جلده ده بجلد جديد بيقولوا عليه سوفت باور، وتاريخيا ده بدأ في النص التاني من السبعينات، بالظبط من بعد الانفتاح، الله يخرب بيت الانفتاح واللي فتحه علينا، المهم ان من ساعتها والمستعمر، بكسر الميم، بقي بيسطر علي مستعمراته من هناك من مكانه بالريموت كنترول.
المهم .. انا قلت لمسلم ان السبب الرئيسي لغلبة اللغة الانجليزية علي اللغة العربية في أغلب المجتمعات العربية كان ليه شقين؛ شق ثقافي، وشق تجاري. الشق الثقافي كان متمثل في هيمنة الثقافات الاجنبية وخصوصا الامريكية علي المجتمعات العربية، لدرجة ان مصطلح فيلم أجنبي بالنسبة للقناة التانية المصرية لا يعني سوي فيلم أمريكي، باستثناء برنامج بانوراما فرنسية طبعا، أما الشق التجاري، فكان متمثل في هيمنة السلع والمنتجات الاجنبية علي السوق المصرية، لدرجة ان كل آلة بتعمل بالماتور لازم تبقي ألمانية، وكل جهاز كهربائي لازم يكون ياباني، والشرط الأساسي للقبول في وظيفة بأي بنك او شركة أجنبية هو الالمام التام بالانجليزية، لكن الغريب بقي هو وجود الهيمنة دي أيام العثمانيين والانجليز، وكنا بنلبس الطربوش ونشتغل في الكوبانية، لكن من غير ما نستبدل العربية بالانجليزية.
كان طبيعي اني أشوف في عيون مسلم نظرة رضا ممزوجة بعدم الفهم، وكان طبيعي برضه اني أسأل نفسي عن المبررات الحقيقية غير الموضوعية لاستبدالنا لغتنا العربية باللغة الانجليزية في أبسط صور حياتنا اليومية، لغتنا العربية .. لغة القرآن، لغة الضاد، وراهنت نفسي ان ستين في المية علي الاقل من الناطقين باللغة العربية مايعرفوش انها لغة الضاد، او ما يعرفوش هي ليه اسمها لغة الضاد، وإلا ماكانوش استبدلوها بلغة تانية، دول حتي استبدلوا كتابتها بحروفها الاصلية وكتبوها بحروف لاتينية، وبحجة مضحكة مبكية، قال ايه "اصل الكيبورد مابتكتبش عربي ،، او يقولك: اصل انا بكتب اسرع بالانجليزي" وكانت النتيجة هي جنين مشوه بيعتبر رقم خمسة بديل لحرف الخاء ورقم ستة بديل لحرف الطاء، وحرف الدي بديل لحرف الضاد، الحرف اللي مافيش اي لغة علي وجه البسيطة بتسخدم مخرجه غير اللغة العربية.
مسلم، الشاب القبرصي المولد والانجليزي الجنسية، اسلم من 8 سنين وبيتعلم اللغة العربية، عاش في سوريا 3 شهور وفي مصر 6 شهور ولسه هايقضي في مصر كمان 3 شهور قبل ما يرجع لانجلترا لزوجته واسرته، مسلم رفض بإصرار انه يتعلم اللغة العامية المصرية، ورفض حتي التعامل بيها، وهايمشي وهايسيب سؤاله من غير جواب، وهايسبني في حيرة طول عمري لاني ماعرفتش اجاوب علي سؤاله البسيط: هو ليه المصرين مش بيتكلموا بالفصحي، لغة القرآن، لغة الضاد؟
5 اتكلموووووو:
لاأخفيك إعجابي ولكن كم انت كبير بهذا الطرح الذي ينم عن رؤية وبصيرة وكم اكره استعارة الألفاظ والمعاني من الرفيق محمد عبد الله ولكني لا اجد تعبيرا حقا يصف شدة إعجابي بالأسلوب الأكثر من رائع لموضوع في غاية الأهمية وفي رأيي هو محور القومية والثقافة والانتماء والرقي والتقدم وكل المعاني التي نسعى ونتطلع لتحقيقها والقيم التي اضمحلت من دهور بفعل التغريب والعولمة والذي للأسف لجانا له بأنفسنا وبالحديث عن صديقك القبرصي المولد الانجليزي الجنسية فحتى الآن لم يتنازل الانجليز عن أساليبهم الخطابية او غيروا في اللغة كما فعل الامريكان من قبلهم ولازالوا متشبثين بكل أعرافهم الثقافية والتي لن تقلل من شأنهم أمام الأمم الأخرى ولا عجب انهم من اهم الامم اليوم التزاما بالقيم والمبادئ القديمة والاعراف التي نشاوا عليها مع كل مظاهر الحداثة والتطور
كشرط للانبهار بالمتغلب والرغبة فى تقليده الشعور بالانسحاق والدونية وقلة القيمة ومن ثم السخرية من الذات والتراث والهوية..راقب نظرات الناس تنضح بالتهكم عندما يرون شخصا يرتدى زيا عليه كلمات بالعربية..هنا تتحول لغتنا إلى مجرد وسيط للتعبير عن السخرية من الذات..بعض المنتمين للطبقات العليا والمرفهة يفضلون استعمال الانجليزية والفرنسية فى الأحاديث اليومية العادية غير واعين أنهم بذلك قد بلغوا الدرك الأسفل من الانحطاط إلى درجة العجز عن التعبير عن ذواتهم بلغاتهم الأصلية التى تنتابهم رغبة خفية فى تركها لرعاع الطبقات الدنيا..أما الطبقة الوسطى فهى تكافح بأظفارها لكى تصعد وتلتحق بمن فوقها وفى صعودها تكرر نفس الخطيئة اعتقادا منها بأن الرطانة بالانجليزية كفيلة برفعها لأعلى
بالمناسبة..ذكرنى ذلك الموضوع بشعور عارم بالتقزز ينتابنى وأن أشاهد قناة كوريا تى فى فأجدها تعرض أغانى الروك والراب باللغة الكورية..وأنا الذى فرحت جدا إذ عثرت على قناة أجنبية غير أمريكية فلم أجد سوى قناة أمريكية تبث باللغة الكورية..وإنا لله وإنا إليه راجعون
هل أطلت التحذلق؟..لا بأس..أشعر بأنى فى بيتى وليس على خنق قدمى بالحذاء أو خنق كلامى بالاقتضاب
أشعر كذلك أننى أمام أحد الأمناء على الضاد وأن على أن أقول لك شكرا
و إذاً شكرا
وأقول لكم بكل الصدق اني منبهر الى أقصى حد بما كتبه ابني العظيم سقراط, سقراط هذا العصر , لقد كتبت كثيرا انا وزملائي في زمننا الماضي عن هذا الموضوع حتى جفت حلوقنا , ولكن لله الحمد ان المسيرة لم تنقطع وان ابني سقراط من الذين وضعوا لغة الضاد امانة في اعناقهم , ولهذا ففي يوما ما سيكتب لمسيرتنا النجاح , والى الله تصير الامور .
(( هكذا كان من الممكن ان يقول العقاد رحمه الله ))
ايه يا عم محرم الابداع ده والله العظيم حرام عليك سيب لنا مكان يا اخي لا لا ولو استمريت على كده انا مش هاكتب هما تاني بجد احسنت "كشرط للانبهار بالمتغلب والرغبة فى تقليده الشعور بالانسحاق والدونية وقلة القيمة ومن ثم السخرية من الذات والتراث والهوية"
يعني مش عارف اقوك ايه بجد على الطرح بس موضوع كوريا تي في ده مش واضح شوية ةانت متضايق ان المرض ده صايب غيرنا ولا ايه مفهمتهاش اوي الجزئية دي وبالنسبة للأخ بتاع العقاد وجفت حلوقنا ابو عبد الله فكك من الكلام ده حبيبي والله يا ابو السييد
المقصود وصل
Post a Comment