
النهاردة النهاردة 9/9/2009 يوم مميز قوي والنهاردة كمان 19 رمضان يعني 19/9/1430 وبحسبة بسيطة نعرف ان النهاردة فيه خمس تسعات .. ايه بقي فايدة الكلام الفارغ ده، طيب هاقولكم على كلام تاني فارغ برضه وبعدين أقولكم فايدته ايه .. السنة اللى فاتت يوم 9/9/2008 كان بيوافق 9/9/1429 والغريب برضه ان اليوم ده كان فيه خمس تسعات بس المهم بقي من كل التسعات دي ان ده اليوم اللى انا بقيت فيه رسميا مدون او بمعني أصح بقي عندي مدونة اقدر العب فيها زى مانا عايز واقدر اقول فيها كل اللى انا عاوزه وبما ان النهاردة عيد ميلاد المدونة فالموضوع هايبقي استثنائي يعني اللى مش مهتم يقف هنا ويقفل الصفحة وانا مش هازعل. اللى جاب لك يخلي لك الموضوع استثنائي علشان أسباب كتيير أهمها على الاطلاق انى بتعامل مع مدونتي من يوم ما جت الدنيا على انها حتة مني او على انها بنتي وحتي كل الناس اللى قلت لهم ع الحكاية دي كانوا بيردو عليا بتريقة نفس الرد "اللى جاب لك يخلي لك".
لسه بنجرب لحد النهاردة كانت الجملة اللي مكتوبة تحت اسم المدونة بتقول "لسه بنجرب .. يا مسهل" وده كان شعار المرحلة الاولي كنت لسه مش متأكد اذا كنت هانجح كمدون ولا لأ، وزي ما قلت فى اول تدوينة خالص ((دي مش نوتة .. دي مزيكا)) ان ده مش هدف فى حد ذاته دي وسيلة لهدف تانى اكبر يمكن اكون ماحددتش زمن معين للمرحلة دي لكني حجات كتير خلتني اعتبر انها انتهت اهمها اني ألميت بعالم التدوين الي حد يتناسب مع بداية المرحلة التانية.
جدارية فرعونية طول السنة اللى فاتت المدونة كانت عاملة زي جدارية فرعونية ضخمة متسجل عليها كل المحطات اللى مريت بيها خلال السنة دي، على الرغم من عدد التدوينات القليل والفترات الطويلة اللى بتفصل ما بين بعضها البعض واللى امتدت فى بعض الاحيان لشهرين، لكن لما بنزل لاخر الصفحة واضغط علي "Older Posts" واقرا التدوينات القديمة بعيش تماما فى توقيت كتابة التدوينة وبفتكر كل الخبايا اللى موجودة بين السطور بلغة ماحدش هايفهمها غيري لاني الوحيد اللى حستها وقت كتابة التدوينة. فى تدوينات بفرح قوي لما بقراها واخد قلم فى نفسي واقول انا واد جامد، وسعات بحس بالكسوف من نفسي لما اقف قدام غلطة لغوية أو نحوية انا قصدت ما اعدلهاش علشان تفضل تفكرني انى بغلط [بس كلام بيني وبينكم كان في غلطة شنيعة فى التدوينة اللى فاتت وانا عدلتها بعد كام اسبوع وماعتقدش ان حد خد باله] وبزعل قوي لما بفتكر تدوينة معينة تدوينة عجبتني جدا جدا بعد كتابتها لكن بزعل قوي كل ما اقف عندها وابص على رقم التعليقات والاقيه "جراند زيرو" على رأي الاستاذ احمد عطية مدرس الفرنساوي، ربنا يمسيه بكل خير، وعلي سبيل اعادة البعث هي دي التدوينة ((أتعبدون ما تنحتون))
النهاردة
جدارية فرعونية
15 اتكلموووووو:
الف مبروك يا محمد بجد انت انسان كويس رغم ان معرفتي بيك مش من مده طويله ولا حاجه وشكرا علي موضوع بوبوس اللي انا لسه مقراتهوش بس ربنا يستر
والسنه الجايه تكون وصلت الي اهدافك والي الامام دائما يا
جميييييييييييييييييييييل
م.علاء ريحان
كل سنه و انت و المدونه طيبين و بكل خير ان شاء الله يا سقراط ...
و رمضان كريم رغم انها متاخره اوي ...
بجد المدونه كلها رائعه ما شاء الله عليها و انا بجد من المداومين علي قراءتها مش عشان انا اعرفك , لكن عشان هي فعلا تستاهل ان الواحد يستنى كل فتره- الجديد فيها- ...
كل سنه و انت طيب تاني و يارب ربنا يجعل كل تسعات حياتك احلي ايام حياتك يا فندم ...
كل سنة والمدونة طيبة
وتعكس كل ابداعاتك وكل اللى عايز توصله بطريقتك
ويارب تكون المرحلة الجديدة وش الخير والسعد عليك
رمضان كريم
الاستاذة لطيفة
اولا كل سنة وانت طيبة
ثانيا ماتتصوريش انا سعدت بتعليقيك ده قد ايه
وبجد يشرفني ان مدونتى تبقي من ضمن المدونات اللى تشعري فيها بالراحة
بالنسبة لموضوع فلسفة سقراط
مافيش فلسفة ولا حاجة
انا بحاول اعرض وجهة نظري بمنتهي البساطة
اما بقي موضوع الرغي
فتقدري ترغي براحتك يا فندم
بجد انا بتشرف بتعليقاتك الجميلة
كل سنة وانت طيبة
ورمضان كريم عليكي
باشمهندس علاء
بجد انا مش عارف اقولك ايه
واصلا مش هاينفع اقول حاجة
لان اى حاجة هاقولها هاتبقي اقلل من انى اوصف مدي تقديري ليك
ربنا يخليك يا معلم ع الدعوة الجميلة دي
وان شاء الله السنة الجاية تعلق تعليق على موضوع شبه ده
ولو ان الفطار مش هايكون له طعم من غيرك
وخصوصا دويتو السلطة اللى هانتحرم منه
كل سنة وانت طيب يا جمييييييل
وعيد سعيد عليك ان شاء الله
انونيمس
وانت طيب وبكل صحة وسلامة
ورمضان كرييم عليك
ولو اني مش عارف انت مين
وان كنت مخمن
من روح الكلام
بس الضمائر مش مخلياني اعرف اذا كنت انونيمس ولا انونيماساية
انا متشكر جدا على شعورك الجميل ده
ومتابعتك للمدونة
كل سنة وانت طيب
وعيد سعيد عليك
انونيمس التانى
وحضرتك طيب يا رب
وربنا يخليك ع الدعوة الجميلة دي
ورمضان كريم عليك
يا باشا كل سنة وانت طيب... كل سنة وانت مدون بتعليقات أو بدون تعليقات
:)))
ربنا يخليك يا دكتور احمد
كل سنة وانت بكل صحة وسلامة
وكل سنة وانا مدون بس وانت بتشرفني
هيه يا فتى..أكملت العام إذن..عام من الشقاوة واللماضة وكشف المستور..أى هدية تريد؟..لو كان الأمر بيد العجوز لأعطاك جائزة (.....) للمدونين..والقوس فارغ لأننى لا أعرف اسم جائزة المدونين لكن بالتأكيد هناك واحدة تليق بك..أعتقد أنك بالفعل قد تجاوزت مرحلة(لسة بنجرب..يامسهل) إلى مرحلة (وسع يا جدع..سقراط بيدون)..وإذن هايل..مبروك
بالمناسبة..اللى جابلك يخليلك
غرد يابنى..غرد
جدو العزيز
اصلا معرفتك اجمل هدية يا جدو
بس لو هانتكلم جد بقي
انا هديتي انك تيجي الاسبوع ونخرج خروجة كمان
لان اللى فاتت دي ماتتحسبش
لان كان فى ناس مهمين مش معانا
وهايكونو موجودين الاسبوع ده ان شاء الله
فياريت تبقي موجود انت كمان
واطمن مش هانروح الهيئة
اما بقي حكاية غرد دي مش عجباني
بتفكرني بفيلم طيور الظلام
لما كان نظيم شعراوي بيقول لعادل امام
"اشتغل يا حبيب اشتغل"
كل سنة وانت طيب يا احمد
ويارب نفضل اصحاب لغاية ما نعجز بجد
دمت بكل هنا وراحة بال يا جدو الجميل
سقراط
حلو اوى ورائع التغيير ده اللى فى المدونة
والنظام الجديد ده
والالوان الحلوة ديه
ربنا يكرمك ان شاء
كل سنة وانت طيب
وتعود عليك الايام بخير
بس حقيقى المدونة بقى شكلها جميل جدا جدا جدا
Anonymous..
الحمد لله ان الاستايل الجديد ده عجبك
ده اول تعليق كويس عليه
لدرجة اني كنت هاغيره
..
كل سنة وانت طيب
وعيد سعيد عليك ان شاء الله
Post a Comment