يمكن لانى ماحبتش ابقي سلبي...
يمكن لان الكلام طالع من قلبي...
يمكن لان الموضوع يستاهل...
ويمكن لان الورقة والقلم جمبي
يمكن لانها دعوة هاتموت من غير استجابة...
يمكن لان كل دموعي كانت كدابة...
يمكن لانى خايف ابقي جبان...
ويمكن لان الاقصي من غير بوابة
يمكن لان فلسطين عربية...
يمكن لاننا بعنا القضية...
يمكن لاننا نسينا التاريخ...
ويمكن لاننا ضيعنا اللغة العربية
يمكن لان ولادنا مش عارفين عاصمة فلسطين...
يمكن لانهم مش فاهمين عدوهم مين...
يمكن لانهم راحو فى بحر البقر...
ويمكن لاننا انهزمنا فى سبعة وستين
يمكن لان الجبن بقي سيد الاخلاق...
يمكن لان النخوة بيقصرها لنا الحلاق...
يمكن لان الكلمة ارخص من الدم...
ويمكن لان كل اللى باقي شوية اوراق
يمكن لان اللى ضاع شوية اراضي...
يمكن لان ده كله كلام فاضي...
يمكن لان انا مش هنا ولا حتى هناك...
ويمكن لان كرامتى اداست وانا راضي
يمكن لان ده كله رسم وتلوين...
يمكن لان النعام بيحط راسه فى الطين...
يمكن لانى صحيت لقتني بحلم...
ويمكن لان النهارة يوم التدوين...
عن فلسطين
..........
.........
........
.......
......
.....
....
...
..
.
محمد عوض
((سقراط))
20 اتكلموووووو:
الكلام جميل اوى يا محمد
طالع من القلب صحيح زى ما بتقول
انا بقول كدة علشان بجد حسيته اوى
بس اول مرة اسمع عن يوم التدوين عن فلسطين
وبجد مش لاقية كلام تانى اقوله
سندريلا
منورة المدونة كلها
شكرا على كلامك الجميل
اللى طالع من القلب برضه
يوم التدوين ده دعوة للتدوين عن فلسطين
بدأت السنة اللى فاتت فى نفس التاريخ ده
ودى تانى سنة
وبجد ده شرف ليا انى اشارك فى حاجة زى دى
مرة تانية وتالتة
نورتي المدونة يا جميلة
استاذة لطيفة
انا كنت حريص انى اشارك فى حاجة زى دى
لنفس السبب اللى اتكلمتي عنه
ان القضية تفضل عايشة
يمكن اللى بنعمله ده اقل القليل
بس الهدف ان المبدأ يفضل موجود
لو كنا دلوقتى مش قادرين ننصرهم غير بتدوينة
ان شاء الله بكرة ننصرهم بدمنا
انا بجد شاكر جدا لمرورك الكريم
نورتي بيتي المتواضع
السلام عليكم و رحمة الله و بركاته
بجد ماشاء الله
ربنا يبارك لك يارب
بصراحة مش عارفة أرد أقولك ايه
بس فعلا مفيش قدامنا غير اننا فعلا نحيي قضيتنا بنفسنا
و جوا نفسنا
و مش ننساها ابدا
إلى أن يشاء الله شيئا
دمت بود
Soul.o0o.Whisper
وعليكم السلام ورحمة الله ويركاته
بجد انا اللى مش عارف اقولك ايه على كلامك الجميل
انا مبسوط جدا لوجودك
ونورتي المكان
ودمتي بسلام
كل مرة سقراط اكتشف فيك حاجة جديدة
فعلا قصينا النخوة
وفعلا بعنا القضية
اسال الله ان لا يؤاخذنا بما فعل السفهاء منا
وربنا يسترها علينا
واسمحلي ارفع القبة احترااااااااما لقلمك
دمت مبدع
سقراط أيها العزيز..أوقف نزيف قلمك المنكوب بفلسطين فالنكبة بمصر أشد وأنكى..إننا العرب جميعنا نرضى بأن تهوى على رؤوسنا هراوة تنطق بلسان عربى مبين إذ ليس على الرؤساء حساب ولا عذاب ثم نملأ الدنيا صراخا وعويلا لأن الإسرائيليين يرفعون هراواتهم العبرية فوق رؤوس الفلسطينيين..لا أنادى بتحرير فلسطين من أجل الأقصى فللبيت رب يحميه..وإنما أنادى بتحرير فلسطين من أجل الفلسطينيين المشردين بلا وطن ولا عنوان ولا هوية..كما أنادى بتحرير كل البلاد المثقلة باستبداد الوكلاء وشيوخ المنصر
يوم للتضامن مع فلسطين..و364 يوم للتآمر علينا جميعا من فلسطين إلى لبنان إلى العراق إلى مصر إلى السودان إلى الصومال إلى المشردين فى برارى آسيا وأحراش أمريكا الجنوبية إلى ماشاء العم سام من أجل أن تزيد الدولارات واليورو والاسترلينى والمارك فى جيوب آلهة الاوليمب
لفلسطين - ولغيرها فى الواقع - طريق واحد يمر من فوهة البندقية
سقراط..اليوم يحتفل العجوز المخرف بانضمام شاعر مفوه إلى قائمة أصدقاؤه القصيرة..كل التحية لقلمك النازف وأبياتك الحارقة
أحمد محرم
القمر الساهر
بجد كلامك اخجلني
بشكرك جدا على الاطراء الجميل ده
واعذريني لو اتأخرت فى الرد عليكي
دمتى سالمة
احمد محرم
حبيب قلبي
مش هاتتصور انت بتحرجني قد ايه
مش بس لاننا نعرف بعض معرفة شخصية
بس لانى حاسس ان الكلام ده كتير
وخصوصا لما يجي من حد ذوقه راقي زيك
بجد مش عارف اقولك ايه على كلامك الجميل ده
وانا منتظر تدوينتك بفارغ من الصبر
اللى واضح تمام من اسمها
انها هاتكون بالمستوي اللى متعودين عليه من احمد محرم
انا بشكرك للمرة التالتة على وجودك الكريم فى مدونتى
دمت بود
معرفش
كل ما اقرا سطر تيجى فى بالى جملة واحدة
يمكن عشان كل ما سبق
اصل كل حاجة فى اللى انت قلتهم تنفع سبب قوى جدا...تخيل بقى لما يكون كل دة موجود وزيادة كمان..يمكن عشان احنا بقينا مش عايشين اصلا
معرفش بس الكلام حسيته صفعة معنوية
الله ينور ايها العزيز جدا اوى خالص سقراط..او محمد عوض
العزيزة جدا انجي
هو بالظبط زى ما قلتي
علشان كل ما سبق
من غير يمكن
..
..
منورة
سقراط........فينك
تعالى قول انك كويس ومطنش او كويس ومالكش مزاج او كويس ومشغول
يارب تكون كويس وخلاص
انجي
العزيزة جدا قوي خالص مالص
انا الحمد لله كويس جدا
بس مشغول شوية
امتحانات
بكالريوس بقي
هاخلص الاحد الجاي ان شاء الله
انا متشكر جدا جدا جدا على سؤالك عني
وادعيلي بقي
ربنا معاك يا سقراط يا ابنى ...قلبى وربى راضيين عنك يا ضنايا والله بدعيلك
بكالريوس يعنى اخر سنة زيي يا سقراط...طب لما تخلص ابقى قولى حاسس بايه عشان احس بالمشاركة الوجدانية
ربنا معاك باذن الله يا سقراط وترجع مظفر بلا اى خسائر فى الارواح او فى الممتلكات..ربنا يعينك
سلام
انجي
العزيزة جدا خالص قوي
بجد بجد بجد
انا متشكر جدا على سؤالك ودعوتك
وان شاء الله ربنا يوفق كل اللى عنده امتحان
واللى ماعندوش برضه
انا الحمد لله خلصت
بس ما اقدرش اقول اذا كان بخساير ولا من غير
لسه لما النتيجة تطلع
اما بقي بالنسبة لاحساسي
فربنا ما يوريكي
احساس بالرعب
من كل اللى جاي
وعموما ربنا يستر
انا بشكرك مرة تانية على سؤالك
وان شاء الله قريب جدا انزل التدوين الجديدة واتابع كل اللى فاتني
انت مش خلصت؟؟؟؟؟
طب فينك؟؟
لأن المدونة جميلة جداو كل توبيك أحلي من اللي قبلة و كلامك طالع فعلا من القلب والمشوار من مدونتي لحد هنا بعيد فأنا باستئذنك في لينك للمدونة الرائعة دي في مدونتي ولك جزيل الشكر يا سقراط
بوسي
بجد ربنا يخليكي ع الكلام الجميل قوي ده
وموضوع اللينك ده مش محتاج لاستئذان
دي حاجة تشرفني
وبجد انا اللى بشكرك
وكل سنة وانت طيبة
Post a Comment