Friday, October 17, 2008

انت غني ولا فقير؟

ناس كتير بتحب منظر الغروب، المنظر البديع اللى مكسو باللون الدهبي .. لكن حد فكر مرة ان جمال الجزء الدهبي فى المنظر ده نابع من الجزء الاسود، وفى حاجة كمان مهمة .. احنا مانقدرش نشوف منظر الغروب ده الا اذا كنّا موجودين فى الجزء الاسود.

حد سأل نفسه مرة "انا غنى ولا فقير؟" .. يعني لو انت عايش فى قرية بسيطة، او فى حي شعبي ولا عشوائي، انت كده شايف نفسك فقير؟ .. ولو انت عايش فى اشيك عمارة ع النيل، وراكب عربية بنص مليون جنيه، انت كده شايف نفسك غني؟
طيب لو افترضنا ان ده صح، تعالو نربط اللى اتنين دول ببعض، مين فيهم اللى فى الجزء الدهبي؟ ومين اللى فى الجزء الاسود؟ .. طبعا مش محتاجة تفكير، الغني هو اللى فى الجزء الدهبي، والفقير هو اللى فى الجزء الاسود .. يبقي اكيد الفقير ده شايف الغني بس الغني مش قادر يشوف الفقير، لان زى ما قلنا اللى فى الجزء الاسود هو بس اللى بيشوف الجزء الدهبي.

كل الناس اللى موجودين فى الجزء الاسود بيحلموا يخرجوا للجزء الدهبي، لكن كل ما يخرجوا يلاقو نفسهم لسه فى الجزء الاسود .. والسبب بسيط جدا لان الجزء الدهبي اللى فى الصورة دى هو نفسه جزء اسود فى صورة تانية، ولما هما خرجوا من الجزء ده فى الصورة الاولى دخلو الصورة التانية ولما بصو من خلالها كان الجزء الدهبي بقي اسود.
بس كده فى حاجة احنا مش واخدين بالنا منها .. ان الناس اللى كانوا فى الجزء الدهبي فى الصورة الاولى موجودين فى الجزء الاسود فى الصورة التانية وهما كمان مش كانوا شايفين غير الصورة التانية ونفسهم يخرجوا للجزء الدهبي اللى فيها لكن كل مايخرجوا يكتشفوا انهم لسه فى الجزء الاسود ... الموضوع يتوه مش كده؟

الناس اللى عايشين فى القرية البسيطة والحى العشوائي مش بيبصوا للناس اللى عايشين فى الشارع ومش ليهم بيت، مش بيبصو للناس اللى بتموت من الجوع (حسب اخر احصائية 25 الف بني ادم فى السنة)، انما بيبصو للناس اللى عايشين فى العمارة اللى ع النيل.والناس اللى عاايشين فى العمارة اللى ع النيل مش بيبصو للناس اللى عايشين فى القرية البسيطة والحى العشوائي، انما بيبصو للناس اللى عايشين فى قصور... المشكلة اننا مش بنبص من صورة واحدة.
لما بقول لنفسي "انا غني ولا فقير؟" .. بقصد ايه بغني وفقير؟ .. بالنسبة لمين؟ .. بالنسبة لوجهة نظري؟ .. طيب امتى؟ .. يعني وجهة نظري النهاردة؟ ولا بعد عشر سنين؟
لو سألت نفسك السؤال ده وانت باصص لصورة واحدة يبقي انت غني، لكن لو بصيت لكل الصور تبقي اكيد فقير.

ابسط طريقة لدراسة النظريات الاقتصادية اننا نختصر كل العوامل او المتغيرات فى متغيرين اتنين بس، ونشوف العلاقة اللى بينهم، ونكرر التجربة مع كل زوج من المتغيرات دى، وفى الاخر نخرج بالتعميم او النظرية...

فلو احنا اختصرنا الدنيا فى الجزئين دول بس الاسود والدهبي، انت هاتتمني تكون فى انهى جزء فيهم؟ وليه؟
لو وصلت لإجابة السؤال ده تبقي غني
ولو ماوصلتش
تبقي فقير...

8 اتكلموووووو:

بنت صغيرة said...

أنا جيت أسلم عليك
وأزورك إن شاء الله تكون المنفعة والزيارة متبادلة

آه

مدونتك جميلة
موضوعاتك حلوة بس طويلة
محتاجة وقت عشان تتقري
بس عندك سخرية لذيذة
وأسلوب يجبرك تتابعه

اعذرني ف رأيي

بنوته صغيرة

سقراط said...

ايه النور ده كله
انا متشكر جدا ع الزيارة الجميلة قوي دى
وبالنسبة لرأيك
ده حقك انك تقوليه
وانا واجب عليا احترمه
واطمنى انا مش بزعل من الرأي المخالف لرأيي
بالعكس انا ببقي مل\بسوط بيه جدا
انا هانتظرك تيجي تانى
وتقولى كل اللى انت عاوزاه
ونردهالك فى الافراح

nudy said...

انا شفت موضوع الغني والفقير ده لما رحت مع صديقة لمكان رائع الحمال اسمه جزيرة الذهب وكنا بنصور يعني شغل بس عرفت يعني ايه ان الناس دي غنية جدا بالجمال اللي حواليهم وطبعا انا كنت بابص من الجزء الاسود واكيد هما كمان كانوا شايفني من الجزء الاسود نعرفت ان فيه مستثمر كويتي عاوز يشتري المكان ده وطبعا هو كمان بيبص علي الجزء الذهبي عموما البوست ده جميل قوي واسفه لاني ما دخلتش علي الميل ولو قريت البوست الاخير بتاعي ح تعرف ليه باي

سقراط said...

الاستاذة نودي
اولا انا مبسوط جدا من ردك الجميل ده
ثانيا كل اللى انا كنت عاوز اقوله من البوست
اننا هانرتاح لما نحس بالرضا
ثالثا وده الاهم
انت مارديتيش عليا
انا سألتك سؤال فى ردي على بوست ليكي
وانا مازلت منتظر ردك
اخيرا انا متشكر جدا على مرورك الجميل
ونردهالك فى الافراح

ست الحسن said...

طب والله حلوة التدوينة دي
فكرة الأجزاءالدهبي والأسود
ونسبية الأمور
والتحليل اللطيف بتاعك
.....
لأ عجبتني فعلاً

بس تعرف
أنا ساعات كتير بشوف نفسي شحاتة(ودي الحقيقة طبعاً)
وساعات تانية بحس اني عندي حاجات كتير

من فترة مثلاً
حصل ان أكتر من شخص من أصحابي الصغيرين اللي لسة متخرجين
لقوا شغل ببساطة في أماكن محترمة وكبيرة

وانا في سنهم تعبت أوييي لحد ما عرفت ألاقي شغل والموضوع كان صعب جداً

قعدت أفكر ايه اللي عندهم مكنش عندي
وليه فيه ناس حياتها بتمشي بصعوبة وناس حياتها أبسط

بعدين وانا بفكر جت على بالي فكرة غريبة

قلت طيب ياترى أصحابي دول شايفني إزاي
تخيل اكتشفت انهم شايفين
اني حد عنده حاجات كتير أوي ربنا مديهاله وبيحسدوه عليها

لا تتخيل
قعدت أضحك جامد
وبطلت من ساعتها أقارن بيني وبين أي حد


آسفة اني طولت
بس الموضوع بتاعك هوه اللي عميق

تحياتي

سقراط said...

السلام عليكم ورحمة الله وبركاته
الاستاذة/ست الحسن
اولا نورتيني
ثانيا انا ماعنديش اى مشكلة انك تطولى
المدونة مدونتك
ثالثا انا ماعنديش تعليق على ردك
لان كل اللى انا عاوز اقوله موجود فى التدوينة
انا متشكر جدا على مرورك الجميل ده
ونردهالك فى الافراح

القمر الساهر said...

انت بتجيب الربط الرائع دة منين

بجد برافو عليك

رسمت لوحة تحفة وجسدت معانيها باجمل المعاني

Mohamed AbdAllah said...

لن يكون ردي عليك ذا قيمة فيما كتبت ولكني اقول ان طريقة النظر للاشياء تختلف من شخص لآخر فالناس فيما تحب مذاهب وايضا عجائب واعتماد الناس في رؤيتهم للاشياء نابع من مسيرة حياتهم والتي كلما بعدت عن الاصل ونسجت في الفرع كلما اقتربت من حب الذهبي وبغض اسوده وذلك لتباعد منطقة التقارب فبالتالي كره الفقر مهما كان . لا احد يتمنى الفقر و لكنه سنة كونية موجودة لقيام الساعة , لذا فتعامل البشر معه هو دليلك لطبيعة البيئة ومستوى هذا المجتمع من الرفعة والارتقاء الى الذل والانانية والانتكاس واظن الاول هو حال مصرنا المأمول تغيره , اني اظن ان الرضا هو الحل الانسب لمشكلة الطمع وان الغني اذا بعد عن صلفه وكبره ه والفقير عن استكانة وضعفه وعدم اخذه مقاليد النجاح ,سنكون لامحالة في حال افضل ولو لقليل من الزمن .
يقول عنترة ابن شداد :
فلا ترضى بمنقصة وذل
واقنع بالقليل من الحطام
فعيشك تحت ظل العز يوما
ولاتحت المذلة الف عام
وسلام عليكم ............