Wednesday, February 10, 2010

انتهي الدرس يا غبي



السلام عليكم
موضوع التدوينة دي غريب حبتين
ومن غير رغي خلونا نشوف الفيلم
قصدي نبتدي التدوينة
من اول ما عملت المدونة دي وانا مشغول بفكرة "رد الفعل"
اكيد طبعا كل اللي عندهم مدونات مشغولين بنفس الفكرة
واكيد اصلا كل اللي بيعمل حاجة وعاوز الناس تشوفها
مشغول بنفس الفكرة
بس انا كنت باصص للصورة بشكل مختلف
(حلوة الجملة اللي فاتت دي)
المهم
في الكام تدوينة الاخيرة الموضوع ده كان شاغلني قوي
والسبب بسيط
ممكن تعرفه لو نزلت بالماوس بتاعك لتحت شوية
وبصيت علي عدد الردود في التدوينات التلاتة الاخيرة
في كل مرة كنت ببقي منتظر ردود أفعال اكثف واكتر
وخصوصا لاني كنت بعمل كل الطقوس المرتبطة بتسييط التدوينة في كل حتة
في موقع العمرانية بتاع المدونات
وفي صفحات كتييير ع الفيس بوك
وقربت انزل اعلان في بانوراما دراما
لكن ردود الأفعال كل مدي ما بتقل
وطبعا لان نفسي بتحبني زي ما بيقول العسيلي
كانت بتقولي:
(((اكيد في ناس كتيير بيقروا التدوينات دي)))
(((وبتعجبهم)))
(((بس هما ما بيحبوش يكتبوا تعليق)))
انا عارف ان التدوينة بدأت تبقي مملة
بس نفسي بتقولي:
(((كمل كلام)))
(((اكيد الناس اللي بيقروا كلامك من غير ما يردوا مش هايحسوا انها مملة ولا حاجة)))
انا هاقولكم علي حاجة ممكن تخليكوا تفهموا انا قصدي ايه من غير ملل
حد عمره فكر في "الثانية"
اه الثانية اللي الستين منها يعملوا دقيقة
حد فكر مرة في الثانية اللي هو عايشها
يعني مثلا انت دلوقتي بتعمل ايه؟
طبعا هاتقولي بقرا التدوينة
مانا عارف
قصدي يعني لو بطلت قراية دلوقتي حالا
وفكرت في الثانية دي
انت فين في الثانية دي؟
انت فين على الكرة الأرضية؟
انت فين علي خريطة عمرك؟
بتعمل ايه في الثانية دي من عمرك؟
وبتعمل ايه في الثانية دي من عمر الكرة الأرضية؟
....
...
..
.
اه .. واضح ان الموضوع ابتدي يقفش مني
طيب هاقولكم علي مثال بسيط
ممكن تفهموا منه انا عاوز اقول ايه
ولو ما فهمتوش بقي امري لله
تفوا ع المدونة وصاحبها وماترجعوش هنا تاني
المهم
شايفين الصورة اللي فوق في اول التدوينة
اه بمناسبة الصورة
من يوم ما عملت المدونة
وانا حريص اني ابقي دقيق جدا في اختيار الصورة
وانها لازم تعبر عن التدوينة بشكل عميق
لكن عمر ما حد عبر امي بتعليق ع الصورة
ولا حتي يقولي الصورة وحشة مختارها ليه
المهم
نرجع لموضوعنا
شايفين الصورة
الصورة دي عبارة عن ايه؟ حد يقدر يقولي؟
الصورة دي عبارة عن ملايين البكسلات
طبعا دي معلومة قديمة انا عارف
لكن حد عمره فكر في البكسلات دي
يعني لو انا جبت لك صورة هي كلها بكسل واحد
هاتشوفها ازاااااااااااااااااااااااااي؟
اهي الثواني دي بقي عبارة عن البكسلات اللي بتكون الصورة
بس صورة ايه؟
اي صورة
صورة حياتك
عمرك اللي راح واللي جاي
صورة الكرة الأرضية
لحد هنا واعتقد انه كفاية
اللي اتخنق واتبضـ...... مني
يلعن الثانية اللي قرر فيها انه يدخل هنا ويقرا التدوينة دي
واللي لسه
يكمل وأمره لله
تعالوا ناخد مثال تطبيقي
مثلا مثلا .. الثانية اللي انت دخلت فيها الجامعة
انت كنت فين؟
(((أكيد كنت في الجامعة)))
لأ يا غبي ما أقصدش
اقصد يعني الثانية اللي كانت السبب في دخولك
الجامعة دي بالذات
والكلية دي بالذات
انت ثانيتها .. كنت فييييييييييييييييين؟
كنت فين من عمرك؟
وكنت فين من عمر الكرة الأرضية؟
وكنت فين من دماغك؟
وبنفس المنطق .. الثانية اللي اتجوزت فيها
انت كنت فين؟
انا اقصد الثانية اللي اخترت فيها
اخترت فيها انك تتجوز البنت دي بالذات
وتتجوز في اللحظة دي بالذات
وفي المكان ده بالذات
الثانية اللي انت دخلت فيها الجامعة خدنالك فيها صورة
والثانية اللي اتجوزت فيها خدنالك فيها صورة
كل صورة من دول بتتكون من بكسلات كتييييييير قوي
البكسلات دي عبارة عن ثواني عدت عليك
اتصرفت فيها تصرفات معينة وبطريقة معينة
التصرفات دي هي اللي خلت الصورة في الثانية اللي دخلت فيها الجامعة
او الثانية اللي اتجوزت فيها
تتطلع بالريزوليوشن ده
علي فكرة...
لحد هنا بقي واللي مش عارف يعني ايه ريزوليوشن يطلع بره
المهم
نطلع من الحكاية الطويلة دي بإيه؟
بإن كل ثانية بتعدي عليك هي عبارة عن بكسل
بكسل في صورة لسه هاتتصور
هاتتصور في ثانية
تانية لسه هاتيجي
ممكن تجي بعد ثانية او بعد سنة
المهم ان علشان الصورة تطلع حلوة
لازم الريزوليوشن يكون عالي
وعلشان الريزوليوشن يكون عالي
لازم البكسلات (اللي هي الثواني) تكون مركزة
وعلشان البكسلات (اللي هي الثواني) تكون مركزة
لازم انت تكون مركز
ايون
لازم انت تكون مركز في كل ثانية منهم
وتعرف اذا كان اللي انت هاتعمله في الثانية دي
في صالح الصورة الكبيرة ولا لأ
اهو انا بقي كتبت التدوينة الطويلة دي
علشان اقول ان انا كنت فاكر اني كنت مركز
بس لما الثانية الموعودة جت
والصورة طلعت
لقيتها باهتة قوي
في كل مرة كنت بكتب فيها تدوينة
كنت ببقي عارف انها عبارة عن بكسلاية واحدة
في صورة المدونة الكبيرة
فكنت ببقي حريص انها تبقي مركزة
علشان الريزوليوشن يكون عالي
والصورة تطلع حلوة
فكنت بدقق قوي في الالفاظ
والفرق ما بين لفظ ولفظ
وفي القواعد النحوية في حالة الكتابة بالفصحي
وفي الأخطاء الإملائية
وفي الصورة
الصورة بتاعة كل تدوينة
بس اكتشفت ان ماحدش بيدقق في الصورة
ولا حد بيدقق في التدوينة
فقلت علي ايه بقي الواحد يتعب دماغه
ما اللي يجي علي بالي ادبّه في المدونة وخلاص
طالما كده كده ماحدش هايرد
وكده كده الصورة هاتطلع باهتة
بلا وجع دماغ بلا كلام فاضي
لسه هايقولك ثانية ثانية
ونركز في الثانية علشان الريسوليوشن
ومش عارف بسكلتات ايه
يا عم رووووح
ده انت طلعت واد تييييييييييييييييييييييييييييييييت
وانا اركز ليه
ماهو .. أستك منه فيه
المهم
طول مانا بكتب التدوينة دي
وفي مشهد من فيلم عمال يدور في دماغي
مشهد من فيلم
“Shortcut To Happiness”
لما كان أنتوني هوبكنز بيدافع عن أليك بالدوين
قال حتتة دين مرافعة
قال:
What my client really wanted, was readers
He wanted people to read what he wrote
He’s a writer
That’s what writers want
An audience
An audience for his words

13 اتكلموووووو:

اللي فرط يكرط!! said...
This comment has been removed by the author.
Unknown said...

العزيز جدا اوى خالص /سقراط
على فكرة بقى بقى بقى
انا قلتلك على الصورة بتاعة موضوع القلعة انها حلوة...متضيعش مجهودى لو سمحت لو سمحت

على فكرة...لما بسمعك بتشرح بحس انى مبفهمش حاجة..انت من الناس اللى مبيفتحوش بقهم غير عشان يعلموا اللى حواليهم حاجة جديدة..دة مش نخع على فكرة انا مفتكرش مرة اتناقشت فيها معاك غير وانبهرت

كمان انت بتتناقش فى اكثر المواضيع جدية بصيغة مرحة كدة تخلي اللى قدامك ميزهقش

المهم

كلامك عن رد الفعل كلام محترم اوى...اما كلامك عن البكسلات فبيحط البنى ادم مننا قدام حقيقة قاسية بعض الشىء..ان صورته باهتة

بتكلم عن نفسى طبعا..انا مع ان البكسلات بتاعتى كل بكسلاية فيهم كويسة لوحدها لكن لما بتتحط كلهم مع بعض..الصورة بتطلع باهتة وملغوشة والرزليوشن مش تحفة

يعععععععععع الشاى معسل اوى..معلش اصلى توقفت عن التعليق وشربت شوية شاى فلقيته معسل اوى ويموع النفس

عودة لموضوعنا

تعرف يا محمد عوض..ممكن يكون العيب مش فى الصورة..ممكن يكون الواحد اللى بيبص عليها نظره ضعيف ومش واخد باله..يعنى مثلا ناخد مثال بحضرتك

التدوينة الاخيرة بتاعة ميت عساس..كان عندى كلام كتير اوى يتقال عليها..بس النت كان بايظ فمعرفتش اقول رايي وبالتالى الصورة موجودة وكويسة بس انا مقلتش رايي وبالتالى انت مش شايف الصورة كويس

كمان شوية شاى

تمام

بص يا سيدى..العيب مش فيا..العيب فى الضى..معرفش بس انا فعلا مش مقتنعة ان الصورة بعد كل العمر دة يطلع الرزوليوشن بتاعها زفت

انا شايفة ان الصورة بتاعتى ايام ما دخلت الكلية كانت طين..دلوقتى البكسلات زادت وبالتالى الجودة بقت اعلى
بس معنى كدة ان الصورة اتحسنت؟؟ ابدا
ليييييييييه؟؟ عشان عينى مش شايفة دة
ليييييييييه عشان فى عوامل تانية مخليانى مركزة على الحاجات اللى لسة محققتهاش
ليييييييييييه عشان البنى ادم انانى بطبعه

فعلا الشاى وحش وبارد كمان..يللا مش مهم

انا بصفتى ممن يرتدون العوينات..احب اقولك احنا محتاجين نمسح النضارات عشان نشوف كويس

مش معنى كدة ان الحياة فل وان الصورة حلوة واحنا هنقعد نأنتخ لحد ما تتعدل لالالا نو نو نو انا قصدى نشتغل..كونك تمسح النضارة دة فى حد ذاته مجهود سوف تثاب عليه

اشطة؟؟؟؟؟

انا هقوم اعمل كوباية شاى تانية عشان كوباية الشاى دى عكننت عليا

سلام

اللي فرط يكرط!! said...
This comment has been removed by the author.
اللي فرط يكرط!! said...
This comment has been removed by the author.
Anonymous said...

كمل كلام يا محمد

Anonymous said...

أكيد الغبي هايكون فهم الدرس ان شاء الله ..

وبجد أنا عندي كلام كتير عايزة اقوله بس عارفه انه مش هاييجي حاجه جنب كلام اصحابك اللي اداني انا نفسي حماس .. واكيد عمل معاك انت كمان كده

وبما اني اصلا مش بعرف اعبر عن اللى عايزة اقوله .. فخليني اكتفي باني أأيد كلام نفسك ليك:
"أكيد في ناس كتير بيقروا التدوينات دي .. وبتعجبهم .. بس هما مابيحبوش يكتبوا تعليق"
وتأييدي للكلام ده مش عن شيئ الا عن تجربه لاني اولى الناس دول .. فتاني هاقولك زي مانفسك بتقولك:
"كمل كلام يا سقراط"

and be sure that "I'm one of ur audience, I'm one of the people who read what you wrote ya mohamed"
وعارفه ان انا اكيد مش كفايه .. بس في ناس زيي كتييييييييييييير اوي انا متاكده من ده :)

شكرا يا سقراط واسفه على الإطاله :)

Anonymous said...

السلام عليكم

انا اول مره ادخل المدونه ديه النهارده وبجد اول مره اكمل تدوينه لاخرها فى مره واحده وبتركيز شديد


انا وصلت لمدونتك عن طريق الفيسبوك وبصراحه الاسم شدينى للمدونه اوى

انا بس عايزه اقولك حاجه انا بقالى 3 سنين وداخله على الرابعه وانا بكتب فى المدونه بس مش بانتظام وعندى مدونات كتيره بتابعها بس مش بانتظام برضه بس مش بعلق الا على تدوينات قليله جدا على الرغم انهم كلهم بيعجبونى بس سبب انى مش بعلق حاجات كتيره

اولها انى ساعات مش بلاقى تعليق اقدر اقوله ويوةصف مدى اعجابى بالمقاله فبعتبر اى كلام هقوله مش هيديها حقها وخصوصا لما تلاقى ناس علقت وقالت كلام شبيه للى عايز تقوله فبتحس ان الصمت افضل تقدير فى الوقت ده

وثانيها انى انا بحس ان بعض التعليقات بتبقى مجامله يعنى انا علقت على مدونتك يبقى انت لازم تيجى وتعلق عندى وبما انى مش بدخل بصوره منتظمه فغالبا الوقت الى بدخل فيه بكتب تدوينه جديده وفى نفس الوقت بتابع المدونات الى ضيفاهم عندى فبخاف انى اعلق عند حد فيعتقد ان ده بس فعل ومستنيه رده الفعل بتعليقه على تدوينتى الجديده !

انا عارفه انه ممكن يكون تفكير متخلف شويه بس انا بطبيعتى مش بحب احس انى بجبر حد على شئ ومش بحب المجامله تماما

ايه يابينتى الرغى ده كله

المهم الى كنت عايزه اقوله ان مش معنى ان عدد التعليقات قليل يبقى قيمه التدوينه يساوى هذا العدد

بالعكس انا بجد عجبانى جدا مدونه حضرتك وفعلا ناويه اكون من المتابعيين لها بانتظام ان شاء الله

وفعلا مدونتك فهمتنى معنى التدوين الى يعتبر ان مدونتى بعيده كل البعد عنه :)

فانا من الناس الى بتكتب الى بييجى فى دماغها او ساعات بكلم نفسى


لا بجد جزاك الله خير على مدونتك الى فعلا جميله جدا


واسفه على الاطاله

Alaa' El-Hawary said...

عاجبنى اسم التدوينة والله ..
بس عندى ملاحظات بما انى بدون بردو و ببقى نفسى حد يقولى حاجه غلط عملتها او حتى صح :D
رغم الاطاله بس الموضوع جامد ..
بصراحه خالى مخى يشتغل و يفكر و اعدت فعلا اسال نفسى انا فين فى الكره الارضية و بعمل ايه فى حياتى ..

اه ماقولتش ملحوظتى ( خد بالك من كلامك فى كذا حته ماحبتهاش مثلا زيى .. انك بتقولى للى بيقرا لو مل يقفل و يمشى من المدونة .. كنت ممكن تكتب حاجه تانيه تشد بيها انتباهه غير انك تقولى مثلا ابقى تف على المدونة او فيما شبه ذلك تقريبا ..

عموما انا عرفت المدونة من الفيس بوك و اعتقد انى هتباع :)

محمد حامد said...

صديقي الفاضل
لم أدرك لما كل تلك المبالغة في الأمر ، على حد تعبيرك فالأمر كله نابع من رسم ذاتي للوحة حياتك التي عبرت عنها بالبيكسلات ف الصورة الكبيرة
ووفقا لتقديراتي المتواضعة جدا مقارنة بكم فإن هذا لا يعني أنك تحتاج إلى أي شيء أخر
فباعتقادي هذا يكفي
بمعنى تاني يا محمد
انت عملت كده لنفسك
هايل
ايه اهمية اي حاجة تانية
المشكلة الحقيقية انك تكون حاسس بانقطاع المردود العكسي من بعض الأشخاص أمنا اللباقي فأيه أهميتهم
يعني انت بتكتب علشان توصل رسائل معينة أما من أراد فليؤمن
انته بتعمل كده لأنك مش هتعرف تعمل أقل من كده
ودي كلها حاجات كويسة وبصرف النظر تماما عن أي شيء أخر
واختتم بأن أنا لو مكانك انا يكفيني إن بضعة أشخاص أو شخوص يكون لهم أي مردود ايجابي من اللي انا بكتبه
لأن انا مستأذنتش أي حد قبل ما اقرر اني اعمل مدونة أو اني اكتب اصلا
انت بتكتب لنفسك في المقام الاول
عسى أن ينتفع البعض مما تكتب ومتخليش أي حاجة ف دماغك غير كده
بيتهيألي إن الدرس لسه مانتهاش تقريبا دي حاجة اتعلمناها منك
ملحوظة أخيرة متندهش لو عدد تعليقات المدونة دي كان أعلى بكتير من التعليقات الفائتة ف التلات تدوينات الاخيرة او لو جالك تعليق ع الصورة

feps said...

السلام عليكم
انا مش هعرف اعلق زي الناس اللي علقت دي
بس احب احييك على طريقة السرد اللي متخليش الواحد يمل وفي نفس الوقت ما يندمش انه كمل
بالتوفيق

Unknown said...

سقراط
:)
تعرف
انا ممكن جدا اقرا و ماكتبس تعليقات
خصوصا في الوقت اللي زي دلوقتي
يعني الوقت السابق للنوم :)
بس انا هكتب تعليق
عشان خاطر المرافعة اللي في الاخر
و هاقولك حاجة كويسة اوي
don't expect too much
دي قاعدة من قواعد الحياة الراضية
انك ماتتوقعش كتير من اي حاجة في الدنيا و من اي حد
يعني قاعدة استنى اقل حاجة ممكن تحصل او استنى النتيجة السلبية ..
حصلت النتيجة السلبية او الحاجة اللي مش كويسة يبقى انت في السليم ..
عارف و متوقع
و لو حصلت حاجة كويسة هتفرح بيها مهما كانت بسيطة
:)
فهمتني؟؟
ماتتخيلش ان كل الحاجات تكون عند ظنك الحسن :)
على فكرة انا مبسوطة اني عديت عليك النهاردة
:)

أحمد الشمسي said...

عجبتني التدوينة دي جدا يا سقراط
أنا زيك بحب اركز في البككسلز المكونة لصورة ككل
بالمناسبة عجبني قوي التشبيه بتاع الصور ده
رااائع
والصورة بتاعت البوست ده وحشة قوي
أولا لأنها لا تعبر تماما عن البوست
ثانيا لأنها شعار برنامج فوتوشوب وبالتالي فهي مستخدمة بشكل كبير ومعروفة للناس قوي
وده هيطرح سؤال عن علاقة التدوينة ببرنامج فوتوشوب

انت ما كانتش مركز في البكسلاية دي يا سقراط
:)

MamaZee said...

فهمت :)