كتاب مالوش اسم

اللي في الصورة ده أحمد العسيلي .. أعرفه من زمان .. من أيام البرنامج بتاعه ع ((الاف ام)) اللي كان بيتذاع علي قناة مزيكا في نفس الوقت .. اللي لفت نظري ليه في الاول كانت خفة دمه، لكن بعد كده عجبتني دماغه قوي .. وبعد شوية انا انقطعت عن التلفزيون وعن ((الاف ام)) بحكم بداية دراستي في الجامعة، المهم بعد فترة كده تيجي 3 سنين شفت العسيلي تاني علي قناة (Otv) في البرنامج بتاعه "حبة عسيلي" وبدأت اتابع البرنامج بشغف شديد، والصراحة كان يستاهل .. كان وجبة دماغية جامدة جدا .. يعني م الاخر كانت بتعملي احلي دماغ .. والبرنامج كان عبارة عن مجموعة من الحلقات المنفصلة كل حلقة يتم طرح موضوع جديد في صورة سؤال تتفرع منه اسئلة اخري ويبتدي يدور علي اجابات الاسئلة دي عند الناس في الشارع ويناقش الاجابات دي مع الناس اللي قدام التلفزيون وينهي الحلقة بعد ما يكون ربط عقول كل الناس دي ببعض بالرغم من اختلاف خلفياتهم وثقافاتهم بدرجات متفاوتة ....

ومرة تانية انقطعت عني اخبار العسيلي بانتهاء عرض البرنامج او تصوير حلقات جديدة منه لغاية ما في مرة وانا بلفلف ع اليوتيوب صادفت فيديو مسجل من حلقة من برنامج البيت بيتك كان الضيف فيها احمد العسيلي بيتكلم عن كتابه الاول ((كتاب مالوش اسم)). وفي اقرب فرصة كنت فيها في دار الشروق شفت الكتاب .. قلبته بين اديا وهو جوه كيسه البلاستيك، وقريت الفقرة اللي مكتوبة علي ضهره وبدأت احس بالاحساس المنعش اللي كنت بحس بيه وانا بشوف البرنامج .. حاجة كده زي مايكون عقلي واكل نعناع "ححححححححححــ ..." لغاية ما وصلت لاخر جملة في الفقرة اللي مكتوبة علي ضهر الكتاب واللي بيقول فيها: "بس الاهم ، لانه السبب في كل ده .. اني علي طول بفكر.. بفكر.. بفكر" ومكتوب تحيتها ((احمد العسيلي)). رجعت الكتاب مكانه بعد ما بصيت علي سعره ولقيته معقول، وكنت مقرر اني مش هاشتريه دلوقتي .. يمكن لاني بحب كل حاجة تيجي في وقتها وكنت حاسس ساعتها ان الكتاب ده وقته لسه ماجاش او يمكن لاني ماكانش معايا فلوس كفاية ساعتها .. المهم، بعد فترة كنت في التحرير مع اصحابي وروحنا مكتبة دار الشروق .. دخلت رأسا علي المكان اللي فيه الكتاب .. مسكته بين اديا وانا مبسوط ان وقته جه، ولفت نظري ان الغلاف مكتوب عليه كلمتين زيادة عن المرة اللي فاتت، كان مكتوب عليه "الطبعة الرابعة" وعلي قد ما فرحت لان ده معناه ان ناس كتير اشتروا الكتاب، علي قد ما اتضايقت لما قلبت الكتاب علي ضهره وعرفت ان سعره زاد بأكتر من 25% عن سعر الطبعة الاولي .. وبمنتهي الهدوء رجعت الكتاب مكانه وخرجت من المكتبة واستنيت اصحابي بره لما يخرجوا.

وقعدت اقلب الموضوع في دماغي وأتساءل: ايه وجه الحكمة في تصرف زي ده؟ انا اعرف ان الكتاب لما يوصل للطبعة التانية والتالتة والرابعة ده معناه انه عليه اقبال .. ومعناه برضه ان الطلب عليه عالي وعلي حسب ما يراه الاقتصاد واعوانه ان في الحالة دي لازم السعر يعلي والعرض يقل، بس انا افهم ان ده يتعمل مع السلع؛ الشاي والسكر والبنزين لكن مش مع الكتب .. تكلفة الطبعة الاولي اكيد هي هي تكلفة الطبعة التانية والعاشرة فلما السعر يزيد من غير اي زيادة موازية في اسعار الحبر والورق وادوات الطباعة يبقي ده مالوش غير معني واحد ان دار الشروق ما هي الا مؤسسة رأسمالية احتكارية هدفها الاول والاوحد هو الربح ومالوش لازمة بقي انها تدعي انها بتقوم بأي دور ثقافي او اجتماعي او حتي انساني في مجتمعنا اللي بيتنشأ علي دور واحد من دول.

بالرجوع بقي لموضوعنا اللي خرجنا منه .. الكتاب .. الكتاب عبارة عن موضوعات مختلفة ومنفصلة الي حد ما بيناقشها العسيلي مع القاريء بنفس اسلوبه قدام كاميرا التلفزيون .. ومن اول صفحة في الكتاب بيوضح للقاريء كل حاجة وبيعرفه هو هايتعرض لايه في الصفحات اللي جاية وليه اختار اسلوب الكتابة ده بالذات.... الخ. ويمكن كل ده علشان يمهد له ان الكتاب ده بنسبة كبيرة جدا غير تقليدي .. وغير تقليدي دي مش معناها انه حاجة وحشة ولا حاجة حلوة .. لكن معناها انك لو كنت قاريء قديم هاتقدر تعرف من اول صفحة ان الكتاب بيخرج عن الشكل التقليدي وفي الوقت نفسه لا يتعارض معاه وبالتالي مش هاتلاقي عندك مشكلة انك تقرأه .. ولو كنت قاريء جديد او حتي مابتحبش القراية خالص هاتعرف برضه ان الكتاب مش تقليدي لانك مش هاتقابل المشاكل اللي بتقابلك مع الكتب التقليدية واللى بتخليك ما تحبش القراية عموما.
عنوان الكتاب ممكن يكون اشارة ذكية قوي لفكرة القراية .. لان زي ما قلنا ان كل اللي ما بيحبش القراية مش هايكون عنده مشكلة انه يقراه .. ولما هايقراه هايعرف انه محتاج يفكر في كل حاجة بتحصل حواليه، وهايعرف انه ناقصه حاجة مهمة جدا هي التفكير، وهايعرف كمان انه مابيحبش القراية لانه مابيحبش يفكر وان التفكير اهم خطوة لازم تيجي قبل القراية.
الكتاب مكتوب بالعامية المصرية، والعسيلي في اول الكتاب وضح وجهة نظره في اختيار الاسلوب او اللغة العامية لاكتر من سبب كان اخرهم واهمهم زي ما بيقول:
"المهم من غير رغي يعني قررت اني اكتب زي ما بفكر".
الكتاب ناقش موضوعات مختلفة ومتنوعة في صورة اسئلة وردت علي ذهن الكاتب، ومادة الكتاب كانت عبارة عن محاولته للاجابة علي الاسئلة دي .. مش بهدف انه يقدم مقترحات للاجابة دي، لكن بهدف اعادة طرح الاسئلة دي وغيرها والدعوة للتفكير فيها او الدعوة للتفكير عموما او زي ما بيقول العسيلي في بداية الكتاب:
"كثيرة هى علامات الاستفهام في الدنيا .. ونادرة جدا الاجابات .. والكتاب ده مش هايبقي فيه اجابات ولا حاجة، وحتي لو هايبقي فيه، هو مش مقصود منه الاجابات، المقصود الافكار والاسئلة وبس. ومش حيبقي فيه يقين .. حيرة وبس، اليقين الحمد لله عندنا علي قفا مين يشيل، بس هنا مش حتلاقوا .. اتمني انكو ماتلاقوش".
العسيلي بيحقق في الكتاب ده معادلة صعبة جدا من وجهة نظري بيقدم فكرة فلسفية معقدة جدا بطريقة سهلة جدا علي كل العقول، وخاصة العقول النابذة للتفكير بشكل عام، سواء بقي كان بدافع من الكسل او من البيئة الملوثة اللي بتتربي فيها عقولنا .. واعتقد ان وصول الكتاب للطبعة الرابعة معناه انه بشكل مبدئي نجح في تحقيق هدفه من المعادلة الصعبة دي.
انا ماشتريتش الكتاب لغاية دلوقتي .. بس جالي هدية في عيد ميلادي الاخير، ومن انسان مهم جدا في حياتي وبجد كانت من اجمل الهديا اللي جاتلي في حياتي بس ده ما يمنعش اني اشتري نسخة تانية بس يارب ألحق قبل الطبعة الخامسة.