Tuesday, April 14, 2009

أمــا بعد





فى إحدي صفحات العدد رقم 110 من جريدة الدستور واللى بتاريخ 25 ابريل 2007، نُشر حوار أجرته الجريدة مع عالم النفس المصري الدكتور قدري حفني، وفى الوقت ده كانت بداية الإضرابات العمالية، واللى انتشرت زى العدوي من مكان لآخر ومن مجال لآخر، وكانت الفكرة الرئيسية اللى قام عليها الحوار هى إمكانية أن تتحول موجة الإضرابات دى إلى ثورة شعبية، أو بمعني تانى هل الشخصية المصرية من وجهة نظر علم النفس السياسي تؤهل الشعب المصري إلى مثل هذا التحول؟


النهاردة وبعد مرور أكتر من أسبوع على إضراب 6 ابريل نقدر نقول بكل ضمير مرتاح ان الإضراب فشل، بعيدًا عن أى اتهامات بالعمالة أو الخيانة أو غيرها من التهم التيك اوي، لكن اللى خلى الفشل ده مؤلم قوي؛ ان ناس كتير وأولهم منظمي الإضراب والمشاركين فيه من كافة التيارات السياسية والاجتماعية، كل دول توقعوا ان الشعب المصري بمختلف فئاته هايتفاعل بشكل إيجابي مع الإضراب، لكن اللى حصل كان أكبر من النقيض، لأن الشعب مش بس تفاعل بشكل سلبي .. ده نسبة كبيرة جدا منه ماكانش عندها علم بالموضوع من أساسه.


الدكتور قدري حفني استبعد تماما أن تكون الثورة وشيكة الحدوث أو أن الإضرابات اللى انتشرت عدوتها تتسبب فى انتفاضة كاملة للشعب فى مواجهة الظروف السيئة اللى بيعشها واللى بتزداد سوء يوم بعد يوم، وان السبب فى كده ان المصري مازال عنده امل فى التغيير.


فى نفس الوقت اللى كان فيه حشد من الطلبة بتتظاهر فى جامعة القاهرة مستغلين الحراك السياسي اللى تمثل فى إضراب 6 ابريل للمطالبة ببعض المطالب اللى بالقطع تهم كل طلبة الجامعة، كان فى حشد أكبر بيرقصوا على صوت حماقي هاتفًا بأغنيته الثورية "ناويها" (طبعا الاغنية ثورية لانها عملت ثورة فى انحطاط الذوق العام) والوضع مكانش مختلف كتير فى باقي الجامعات ففي حين ان حماقى كان فى جامعة القاهرة بروحه كان موجود فى جامعة عين شمس بجثته مش بس بروحه.


الدكتور قدري حفني رفض تمامًا تحميل الشعب المصري مسئولية استمرار حالة التدهور اللى بتعشها البلد على كل المستويات، وأبدي استياءه الشديد من كل من يَصِم الشعب بالجهل والسلبية والبلادة، وقال ان السبب فى كده هو وجود فجوة كبيرة بين النخبة المثقفة وبين رجل الشارع العادى "المثقف يدعو الناس إلى الثورة، فإذا لم يثوروا ثار هو عليهم" وان المثقف بيشوف الوضع من منظوره هو مش من منظور الناس، وبيبني افتراضات أحادية البُعد يستند إليها فى التنبؤ بالثورة، وبتكون النتيجة سلبية بالطبع.


النهاردة وبعد أكتر من أسبوع على إضراب السادس من ابريل، أعتقد ان الحدث خد حقه من التحليل والتمحيص والتفنيط والمخمضة، ويكفي إنك تزور أى مجمع مدونات، وتدور على التدوينات اللى بتاريخ 6 ابريل، هاتكتشف ان أغلبها وان لم تكن كلها بتتكلم عن نفس الموضوع وبنفس العناوين، لكن بمنتهي الأسي والأسف نقدر نقول ان بعد كل هذا التناول غير المتناهي من قبل كافة وسائل الاتصال وليس فقط الإعلام ....... ايه النتيجة؟!!


اختيار الدكتور قدري حفني للحوار ده بالذات ماكانش اختيار عابر أو عفوي، لكن كان نظرًا لقيمة الرجل العلمية ولخبرته الطويلة كأستاذ فى العديد من الجامعات، وشغله لمناصب استشارية فى العديد من المنظمات الإقليمية والدولية، وأخيرًا حصوله على جائزة الدولة التقديرية فى العلوم الاجتماعية .. وكل ده معناه ان تحليله أكيد هايكون على درجة كبيرة من الأهمية والدقة. فلو أخذنا برؤيته وتحليله، اللى فى غاية الموضوعية وعلى درجة عالية جدا من الاقناع، نقدر نفهم بالظبط ليه الفشل ده كان مؤلم، لكن الأهم ان كل اللى حس بألم الفشل ده، هو نفسه اللى أخطأ فى التقدير.


عنوان التدوينة "أمـا بعد" هو نفسه عنوان التدوينة اللى كتبتها المدوِنة انجي إبراهيم عن الإضراب، وقالت فيها بمنتهي البساطة انها أكيد بتحلم ان الوضع يكون أحسن، لكن الأهم انها عاوزة تعمل ده بإيدها أو على حسب تعبيرها "أعرف أن هناك دورًا لى فى هذه المسرحية وأحاول أن أؤديه على أكمل وجه.." .. وانطلاقا من الدعوة الضمنية اللى دعت اليها انجي انا كتبت التدوينة دى.
احنا منتظرين ان البلد ينصلح حالها اللى هو حالنا، لكن مافكرناش ان حالها المعووج ده هو برضه حالنا المعووج، وخلينا ناخد مثال بسيط جدا على الكلام ده ... "الطوابير" .. كل الطوابير اللى بنقف فيها من يوم ما نتولد ولحد مانموت، أكيد الحكومة مسئولة عن الفوضي اللى بتحصل فى أى عملية توزيع وبتظهر على إثرها الطوابير، لكن أكيد برضه احنا بنتحمل جزء أكبر من الفوضي دي، لأننا ببساطة عمرنا ما عرفنا ننظم نفسنا فى أى حاجة ...
من الصعب انى أطالب أى حد بأي شكل من أشكال الإيجابية فى موضوع الطوابير بالذات، لأن ببساطة كلنا عارفين السيناريو اللى بيحصل من أول الواسطة لحد الناس اللى بتدخل فى نص الطابور من غير لا إحم ولا دستور، وطبعا كلنا نفسنا الوضع ده يتغير، بس هايتغير ازاى اذا كنا كلنا مستنيين ان حد تانى يغيره؟!
اختصارًا .. التدوينة دى دعوة .. دعوة من غير اسم .. ومن غير بوسترز .. ومن غير دعاية .. ومن غير مجموعة ع الفيس بوك .. دعوة لكل المدونين وغير المدونين .. التزم بدورك فى الطابور .. مش علشان تبقي إيجابي .. لكن علشان تعلم الناس الإيجابية .. علشان يبدأو بيك .. علشان بلدنا ينصلح حالها .. اللى هو حالنا ..

=====================================
الكنبة ... كلمات/ على سلامة



كان يوم جمعة ..
او يوم حد ..
مبتفرقش كتير ..
كنت اعوذ بالله من قولة انا ..
واتنين اصحابي ..
وابن خالتى سمير ..
وبعد ما ضربنا جبنة قديمة ..
وعسل اسود وطحينة وفطير ..
فى البلكونة البحري ..
اللى بتطل ع المنور ..
جنب قفص العصافير ..
ومع كوباية الشاي ابو نعناع ..
دار الكلام عن الاحلام ..
عن الاوجاع ..
وايه لسه فينا باقي ؟!
وايه اللى ضاع ؟!
اتكلمنا عن حرية الابداع ..
والتعبير ..
وماتش الاهلى وطلائع الجيش ..
وعدينا من بعيد ..
على ازمة الزمالك ورغيف العيش ..
وسوء التفاهم ..
بين اتحاد الكورة والجماهير ..
اتكلمنا عن فن العمارة ..
وعن سوء الادارة ..
ويا تري فى كام تقاطع ..
وكام اشارة ..
فى شارع الهرم ..
واتكلمنا عن معني الالم ..
ورجل الترابيزة ..
اللى عايزة تتثبت بمسامير ..
واتكلمنا عن لمبة السلم ..
ازاى بتتسرق ..
وليه بتتحرق كتير ..
ناس تقول م الرطوبة ..
وناس تقول يمكن طوبة ..
وناس تقول احتمال ..
قلة ضمير ..
واتكلمنا عن شارع القصر العيني ..
اتجاه واحد ..
ولا اتجاهين احسن ..
ولا مافيش داعي خالص ..
نروح ميدان التحرير ..
وفضلنا نتكلم ونقول ونزعق ..
وصوتنا يعلى ..
وخالتى تقلق ..
والترابيزة تتهز ..
وانا خايف ع الشاي ..
وع البنطلون ..
و م الفار ..
اللى ماشي ع المواسير ..
بقولك ايه ..
احنا بقي محتاجين فرافيرو العجيب ..
يحل مشاكلنا ..
لما نقوله تعالى ..
يقول انا جاى ..
ويقف ع البلكونة ويطير ..
يا عم ده انا لما ازعل ..
واغضب واحتج ..
واخد موقف واعترض ..
يا دوب الوي بوزي واتقمص ..
او بالكتير ..
انام ع الكنبة ..
وعلى وش الصبح ..
ارضي بأي حاجة ..
علشان ارجع تانى ..
انام فى السرير ..
هى الجبنة القديمة فين ..

19 اتكلموووووو:

مذكرات مشاغب said...

انا ليه وجهة نظر شخصيه في الموضوع ده بالذات

هل الهدف من الاضراب هو تذكير الحكومه بمشاكل الشعب
ام الهدف منها هو الثوره وتغيير الحكم

اذاكان هدف منها هو التذكير ففعلا انا مع الاضراب بشكل كامل
بس المهم انه ميكنش فيه تخريب
وللاسف ان كتير من المظاهرات بيكون فيها مجموعه مخربه
بتكسر وتخرب على الفاضيه والمليانه
عشان كده الامن بيتدخل دايما في المظاهرات
على الرغم اني رافض مبدا الوجود الامني في المظاهرات
لكني بشوف انه ضروري احيانا
بس طبعا بيستخدم استخدامات تانيه غير التامين

حتى في باريس لما العرب اللي عايشين هناك كانو بيعملو مظاهره اثناء حرب غزه كان الامن بيحاصرهم
يعني حتى لما احنا بنعمل مظاهرات في بلاد الحريات برده كان فيه امن وحصار

مش عارف ليه دايما بحس ان فيه ناس كتير مننا عندها نزعة عنف زياده شويه
تلاقي خناقات في الشوارع كتيره جدا
وفي المواصلات
وزعيق ورخامه
بتهيالي مفيش بره الكلام ده
على الاقل مش بالدرجه دي


نرجع تاني للموضوع بتاعنا
اما لو كان هدف الاضراب الثوره
فانا هنا باعترض
وسبب الاعتراض هنا مش اعجابي بالنظام المصري
لا انا ليه عليه تحفظات كتيره جدا
لكن سبب اعتراضي على طريقة التغيير نفسها
لانها بتفكرني بنفس طريقة التغيير اللي حصلت سنة 52
لما قضينا على النظام الملكي وخلينا الشعب هو اللي يحكم نفسه
وبتهيالي كانت كل الناس مبسوطه بالموضوع ده
لكن هو نفس الحزب ونفس الرجاله بتوعه اللي دلوقتي عايزين نغيرهم
وده نتيجه طبعا لان الناس كلها متضايقه من ظروفها وحالتها والزحمه والطوابير
ولو قامت فعلا ثوره وغيرنا
وجبنا الاصلح من وجهة نظرنا
بعد فتره برده هنطالب بتغييره
لاني متاكد ان حالنا مش هينصلح كتير
مهما كان اللي هيحكمنا
لاني ببساطه شايف ان مشكلتنا هي مشكلة شعب
مش مشكلة حكومه او حاكم
والدليل ان امريكا هي الدوله رقم واحد في العالم
رغم تغيير حكامها
واكيد طبعا مش كل حكامها ناس عباقره
بالعكس
انا اعتقد ان معظمهم مكنوش كويسين لشعبهم
لكن سبب قوتهم هو الشعب نفسه

حتى انت لو جيت وسالت اي حد شايف نفسه مناسب انه يكون الحاكم
وقولتله هتحل مشكلة الرشوه ازاي
او مشكلة النضافه
او مشاكل المرور والزحمه
عمره ما هيعرف يحل مشاكل زي ديه
لانها عادات وتقاليد شعب ملهاش اي علاقه بقوانين او سلطه من الحاكم

يعني مثلا عمرو زكي لما راح ويجان
كان في حته زحمه والعربيات واقفه صفين
صف رايح وصف جاي
وسيبين نص الطريق فاضي عشان النظام وهم متعودين على كده
فعمرو لقى نص الطريق فاضي راح جاي معدي بعربيته وقعد يعمل غرز زي ما هو واخد في مصر
والناس كلها بتبصله باستنكار
ولا خد مخالفه ولا اي حاجه
يعني الناس هناك منظمه مش بقوة القانون
الناس هناك منظمه لان دي عاداتهم وتقاليدهم


خلاصة الرغي الكتير بتاعي ده
اننا حتى لو غيرنا الحاكم(مهما كان)مش هيكون ده الحل
لكني متاكد اننا احنا لو اتغيرنا
مش هنكون محتاجين نغير الحاكم

وادعوك لقراءة موضوع كتبته عن القضيه دي وادي اللينك بتاعه
http://mosha3eb.blogspot.com/2009/03/blog-post.html

اعتذر جدا للاطاله
بس انا فعلا كان عندي كلام كتير جدا
والموضوع بتاعك عامل زي الشجره اللي ليها جدور كتير جدااا

تحياتي

سقراط said...

انا ماعنديش اى مانع من الاطالة
دى حرية شخصية
لكن انا هاكون صريح معاك
انا حاسس انك ماقريتش التدوينة خالص
لانى ماتكلمتش عن الموضوع ده خالص
اعذرني لصراحتى
وحاول تقرأ تانى
....
...
..
.
تحياتي

مذكرات مشاغب said...

وكانت الفكرة الرئيسية اللى قام عليها الحوار هى إمكانية أن تتحول موجة الإضرابات دى إلى ثورة شعبية، أو بمعني تانى هل الشخصية المصرية من وجهة نظر علم النفس السياسي تؤهل الشعب المصري إلى مثل هذا التحول؟

بتهيالي انت كتبت كده بالنص
وكان في شكل تساؤل
فانا رديت عن وجهة نظري في التحول ده
وتشعب مني الموضوع شويتين

لكني بسبب الاطاله مرديتش اكمل باقي الرد عن اسباب فشل الاضراب
او باقي النقط اللي طرحتها
لكني اؤكدلك اني مبردش على حد او على موضوع غير بعد ما اقراه
خاصة لو كان موضوع جاد

تحياتي

محمد حامد said...

الموضوع متشعب جدا بس انا من وجهة نظري ان السلبية اللي احنا فيها كمصريين من الممكن انها تكون ايجابية لاعتبارات كتير اهمها تجنب حرقة الدم في دولة يعد شغل البال فيها بالمسائل العامة كانتقام الالهة من براد بت في فيلم تروي
المفروض اني احترم الطابور انا معاك لكن لما حد ياخد دوري واعمل معاه مشكلة ويطلع ابن خالة ابوه امين شرطة واروح في ستين داهية وده حصل بالفعل بطرق مشابهة في حالات كتير انا شوفتها
سيدي الفاضل سقراط انا شايف ان التضامن الانساني بتاعنا - المصريين - بينعدم وده اللي بيخلق حالة الخوف وعدم الاعتراض على الطابور والمواصلات والحاجات اللي انت عارفها
وبعد كل ده انا برده هالتزم بالطابور لاني مش هاعرف اعمل غير كده مش هاعرف اخد دور مش بتاعي او ادخل في كلام حد بيتكلم
بس ايه اللي يجبر حد من اخوانا ايهم انه يغير سياسته

سندريلا said...

يا جمال التدوينة يا سقراط
وعلشان كدة هتاخد 9
انا عموما مش ضد الاضراب
لكن اللى مضايقنى جدا ان الاضراب دلوقتى بقى موضة سخيفة جدا
دلوقتى اى مجموعة من الناس ليهم مصلحة مشتركة يجمعوا بعضهم ويعملوا اضراب للضغط على الحكومة لتحقيق هدفهم
واخرهم اضراب الاداريين فى التربية والتعليم
انا عارفة انهم عايزين ياخدوا حقوقهم بس متهيألى قبل ما يطالبوا بحقوقهم يعملوا الاول اللى عاليهم تجاه البلد ديه
لأن زى ما بتقول ان تحسين حالها للأحسن هيعود علينا بالخير
وزى ما بتقول برضه لازم كل واحد فينا يبدأ بنفسه اولا ومنفضلش نعلق اخطائنا على شماعات حجج فارغة
واخيراأحب اقول ان القصيدة العامية بجد رائعة ومعبرة جدا عن كلامنا وبس.. من غير اى فعل للتغيير للأحسن وفى الاخر بنهرب وبنرضى بقليلنا
بس بجد التدوينة رائعة كالمعتاد طبعا

سقراط said...

محمد حامد
انا مش موافق معاك خالص فى فكرة ان السلبية ممكن تكون بمنظور معين ايجابية
السلبية هى السلبية
لكن انا معاك جدا فى ان انعدام التضامن الانساني من اهم اسباب انعدام الايجابية
كل واحد بيقول المهم نفسي
لكن اللى هايدفعنا اننا نلتزم بمكاننا فى الطابور
اننا نعمل قوة موازنة لقوة اخوانا اياهم
انا سعيد جدا بمشاركتك معانا
وهانتظر اشوفك تانى
تقبل تحياتي

سقراط said...

سندريلا
طبعا منورة زى عادتك
ومتشكر جدا على الدرجة الجميلة دى يا اجمل سندريلا
اما بقي بالنسبة للتدوينة
فانا موافقك تماما على وصف "موضة"
وماعنديش تعليق عليه
وبالنسبة للقصيدة
فدى اقل حاجة عند على سلامة
شاعر جميل جدا
وكلماته فى منتهي التعبير
....
نورتي التدوينة والدنيا كلها يا سندريلا
واشوفك التدوينة الجاية ان شاء الله

Unknown said...

العزيز جدا اوى خالص سقراط
بص يا سيدى انا طبعا موافقة على كل حرف ومعاك فى الدعوة بس عندى تعليق بسيط...انا موافقة ان مفيش ثورة قريب لسبب بسيط ان اللى بيجرى على لقمة عيشه عمره ما يبقى فاضى يثور ابداااااا...عايز الاول ياكل اللى هو ادنى الحقوق الادمية واحقرها بعد كدة هيبقى يعمل ثورة عشان كدة مفيش ثورة هتحصل قريب
المشكلة كمان ان اللى لاقيين ياكلوا عايزين يفضلوا كدة على طول يعنى مش فارق معاهم حاجة خوفا من انهم يفقدوا ميزة انهم لاقيين ياكلوا
طبعا الحتة دى ملعوبة حلو اوى من الحكومة واحنا بالطبع مشتركين عشان حاجات كتير هقولك منهم حاجتين
اولا:اما اننا مبنتكلمش وضاربينها ستين صرمة قديمة ومش عايزين نتحرك عشان خدنا على الراحة وانا طبعا ضد دة على طول الخط
ثانيا:او اننا محبطين جدا وتلاقى شاب زى الفل دماغه فى منتهى النضافة ذكاؤه حاد بطريقة مش طبيعية ومع ذلك عايش دور المحبط اوى وسايب نفسه للدنيا تمرجحه زى ماهى عايزة واكيد مش موافقة على الاسلوب دة بالتاكيد
اللى فاهمين ومش محبطين مقسومين اتنين حبة ثوريين والحبة التانيين بيحاولوا يبقوا ايجابيين

اتكلمت كتير بس الموضوع دة انا نفسى يتفهم صح..ذكرك لمدونتى شرف اصلا

سلام

سقراط said...

العزيزة جدا اوي خالص مالص
انجي
خليني ابدأ من اخر كلامك
انا كمان نفسي الموضوع ده يتفهم صح
الكلام اللى قاله دكتور قدري حفني
قاله من سنتين فاتو
ومع ذلك كلامه كان مظبوط جدا
واتحقق بالقعل فى الاضراب اللى فات
وده السبب اللى خلاني عرضت الحوار
علشان اقول ان الاحسن اننا نتعلم من أخطاءنا
خلونا نصلح كل اللى نقدر عليه
ومن غير مانتكلم
ولا نقول ولا نحلل
مش المهم اننا نثور او لا
المهم اننا نصلح حال بلدنا
علشان ينصلح حالنا
.....
انجي
ردك على التدوينة هو اللى شرف ليا
تحياتي

Soul.o0o.Whisper said...

السلام عليكم و رحمة الله

أولا بأشكرك على زيارتك للمدونة
و يارب فعلا مش تكون آخر زيارة
:)


ثانيا تصفحت المدونة
رائعة ما شاء الله
و إن شاء الله مش هتكون الاخيرة بإذن الله

ثالثا بئا
فين الموضوع بتاع البوست دا؟؟؟
مش ظاهر عندى الا الصورة!!!

الكلام راح يتفسح؟؟
هههههههههه




دمت بود

سقراط said...

السلام عليكم
Soul.o0o.Whisper
أولا انا كمان بشكرك على زيارتك للمدونة
ثانيا بقي وده الاهم
غيري المتصفح اللى انت مستخدماه
واللى هو فى الغالب جوجل كروم
استخدمى انترنت اكسبلورر
والكلام هايبان وكله هايبان ان شاء الله
ثالثا بقي
عجبتني جدا
دمتى بود

القمر الساهر said...

سلام عليكم

ازيك سقراط

انا عايزة اقول حاجة واحدة بس

كل واحد لو اشتغل على نفسه وغيرها الاول ومالوش دعوة باخطاء الاخرين شوية شوية السلبية دي هاتروح

مش معنى ان فلان سرق دوري فانا اروح اسرق دور غيري

فى جملة جميلة قوي قريتها للكاتب كريم الشاذالي

كان معناها ان (الانسان القوي هو من يستطيع محاصرةانفعالاته والسيطرة على الظروف التى تحيط به والتعامل معها وفق ما توليه عله قيمه ومبادئه )

انا مع ان الشعب يعبر عن غضبه وسخطه عن الوضع اللى وصلنا ليه

بس المضحك المبكي انك تجد في هذه المظاهرات اشخاص كان اولى لهم ان يغيروا انفسهم قبل ان يطلبوا تغير ظروفهم

وانا ضد ان نعلق انحرافات البعض على فشل النظام ..فمن ينحرف ويغير مبادئه هو اصلا عنده قابليه واستعدد لذلك

اتمنى ان تكون وجه نظري واضحة

وانا اضم صوتي الى صوتك وارفع معك هذه الدعوة ان نبدا بانفسنا ولا يؤثر فينا التيارات السلبية من حولنا

احييك على المدونة

الى الامام

سقراط said...

القمر الساهر
انا متفق تمام مع رأيك
وان احنا لازم نهتم باننا نصلح نفسنا الاول
اما بقي بالنسبة للدعوة
فاحنا اتفقنا اننا مش هانرفعها
لانها من غير اسم ولا صورة ولا اى حاجة
لكن هاننفذها
=======
بجد انا سعيد جدا بمشاركتك
وسعيد ان عدد الايجابيين بيزيد
تحياتي

Anonymous said...

دايما مواضيعك بتتحول لحلقات نقاش جميلة جدا يا محمد .. أعتقد إنك تقدر تكون محاور تليفزيوني ممتاز ، ده غير إنك كاتب عبقري .
.........
فكريا :
طبعا الموضوع منتهي و كلامك مظبوط .
" العيب فينا " فيا و فيك و في كل الناس و بلاش نفرق بين الحكومة و الشعب لإنك لما تلاقي موظف ممن يقال عليهم مهضوم حقهم بياخد رشاوي بعشرات الألاف يبقى طبيعي إنك تلاقي وزير بينهب عشرات الملايين .
و الحل لافي إضراب ولا في ثورة .. الحل إن أنا و انت نربي نفسنا كويس و نتعامل بما يرضي الله و نربي ولادنا على كده .
.......
بالنسبة للكلام المسجوع اللي في آخر الموضوع فأنا شايف إنه مالوش لزمه لإني حتى مش عارف أصنفه أدبيا .
......
شكرا للموضوع الممتاز ده يا محمد .

محمـود حجـاب

سقراط said...

م / محمود حجاب
اولا نورت التدوينة
ثانيا انا بشكرك جدا ع الكلام الجمبل جدا اللى انت قلته
وواضح اننا متفقين فى الرأي فى موضوع التدوينة
لكن مختلفين تمام فى تصنيف اللى انت بتسميه "كلام مسجوع"
لو مش قادر تصنفه
يبقي كمان مش قادر تصنف اشعار صلاح جاهين واحمد فؤاد نجم وسيد حجاب
الباشمهندس على سلامة شاعر جميل جدا
او انا باعتبره كده
فلسفته بسيطة جدا انها تتفهم
وصعبة جدا انها تتحاكى او تتقلد
او مستعد اجيب لك اشعار تانية ليه
يمكن تغير رأيك
=======
عموما
اختلاف الرأي لا يفسد للود قضية
وانا بجد اتشرفت بردك الجميل

Anonymous said...

المدونه منوره بصاحبها اللي أفكاره و دماغه توزن بلد ..
و أنا والله شخصيا مابنتقدش في على سلامه .. ده حتى باشمهندسين زي بعضنا . هو فعلا الشعر ده مش عاجبني لكن أكيد ليه أشعار تانية كويسه . بس هات انت أي حاجة لصلاح جاهين اللي بحترمه جدا أو لاحمد فؤاد نجم اللي مابحترموش خالص و حطها جنب الشعر ده و هتعرف انت الفرق .
أعتقد الباشمهندس أخطأ في إخراج القطعة دي .
و عموما دي أذواق في النهاية .

محمـود حجـاب

جلال كمال الجربانى said...

السلام عليكم

مدونه رشيقه ولها طعم مختلف
والشعب المصرى مظلوم بين الحكومه والمثقفين المشكله فى السيستم
ياسقراط المدونين .. فشعوب أوروبا مثلا لا يزيدون عنا نحن المصريين فى أى شىء ومعظمهم عشوائيين وليس لديهم من الفكر والتفكر الكثير ولكن لديهم سيستم محكم ولا يسمح للاهمال والتسيب بالتواجد داخل السيستم وإن وجد تروس السيستم تسحقه أو تلفظه حتى يحافظواعلى الأتقان
والجوده والتفوق حتى نظامهم السياسى محكم ولا يسمح بوجود دكتاتوريه رغم أن البشر عموماً يحبون الأنفراد بالرأى يعن داخل كل أنسان دبكتاتور ولو صغير
معلش طولت عليك ولكن تقبل رأيى العمالى وتحيتى ومرورى

ودمت ياسقراطنا بخير

انت تسال والكمبيوتر يجيب said...
This comment has been removed by a blog administrator.
سقراط said...

واحد من العمال
اولا انا بشكرك جدا على رأيك الجميل ده
وعلى تعليقك
لكن اسمح لى اختلف معاك
انا مايهمنيش اعرف ان غيري وحش
انا يهمني انى اكون انا كويس
انا بشكرك مرة تانية على تعليقك
تقبل تحياتي